Түркістан қаласындағы заманауи теннис орталығында үлкен теннистен «Turkestan U16» республикалық турнирі бастау алды. Дәстүрлі жарыс еліміздің теннис спортындағы жас дарындарды анықтауды мақсат етеді. Биылғы додаға еліміздің 12 өңірінен келген 64 талантты жас спортшы қатысып, өз мүмкіндіктерін сарапқа салуда. Бұл жарыста Түркістан облысының намысын «Түркістан теннис клубының» жас спортшылары — Жамшид Сұлтанов, Мади Абибулла, Азамат Саттыбек, Адия Кенжетай, Райиан Жолдасбек және Рахима Абджапарова қорғап жатыр. Жергілікті спортшылардың дайындығы жоғары бағаланып, олардың қатысуы өңір спортын дамытуға қосылған үлкен үлес ретінде атап өтілуде.
Клуб басшысы Алмас Таушаевтың айтуынша, орталықта қазіргі таңда спорттың үш түрі — бадминтон, үстел теннисі және үлкен теннис ерекше қарқынмен дамып келеді. Соңғы жылдары инфрақұрылымның жақсаруы мен жаттықтырушылар құрамының күшеюі жасөспірімдер арасындағы нәтижелердің өсуіне тікелей әсер еткен. Биылғы маусым клуб үшін ерекше табысты болып отыр. Түркістанның жас теннисшілері мен бадминтоншылары республикалық қана емес, халықаралық ареналарда да жоғары жетістіктерге қол жеткізіп келеді. Мәселен, Гозаль Айнитдинова, Заңғар Нұрланұлы, Әдемі Аманкелді және бадминтоншы Дмитрий Панарин сынды спортшылар ірі жарыстарда топ жарып, Түркістан спортының беделін арттыруда. Олардың жеңістері өңірдегі жас буынға мотивация беріп, спорттық орталықтың жұмысының нәтижелі екенін көрсетеді.
Сонымен қатар, 5-7 желтоқсан күндері теннис орталығының ұйымдастыруымен әуесқойлар арасында «Түркістан теннис клубының» жүлдесіне арналған ашық республикалық турнир өтетіні белгілі болды. Аталған жарысқа еліміздің түкпір-түкпірінен келетін қатысушылар саны жыл сайын артып келеді. Бұл өз кезегінде Түркістанды еліміздің спорттық орталықтарының біріне айналдырып, туризм мен аймақтың танымалдығын арттыруға септігін тигізуде. Жалпы, Түркістан қаласындағы теннис орталығының жұмысы өңір жастары үшін жаңа мүмкіндіктер ашып, спорттық қозғалысты күшейтіп келеді. Жергілікті спортшылардың лайықты нәтижелері — жүйелі дайындық пен қолайлы жағдайдың жемісі.
